Регионалниот медиум од јужниот град Струмица, успеа, преку граѓанско новинарство, да ја поттикне интерактивноста и да ја зголеми публиката и приходите. Имено, целта на проектот на ТВ ВИС беше да се создаде нов пристап во постоечкиот однос помеѓу медиумот и јавноста. Со помош на проектот „Media for All“, тие создадоа посебна потстраница на нивниот портал, што овозможи полесна двонасочна комуникација.
„Оваа алатка им овозможува на граѓаните, во секое време, да испраќаат фотографии, информации, приказни и да посочуваат идеи и предлози, како тие да се решат“, вели, Мери Јанчева, проектна менаџерка во ТВ ВИС, додавајќи дека „забележале многу поголем ангажман на публиката како резултат на оваа алатка. Бидејќи таа овозможува полесен пристап до нашиот медиуми, а тоа е главната цел на нашиот проект. Исто така, добиваме објективни и брзи информации од секој дел од југоисточниот регион“.
А бројките го покажуваат токму тоа. Пред имплементацијата на проектот, имало околу 40.000 посети месечно на нивната веб-страница, а во декември минатата година, таа бројка изнесуваше околу 64.000. Од ТВ ВИС посочуваат дека нивната мисија е граѓаните да не бидат само пасивни набљудувачи, туку активно да се вклучат во информирањето и решавањето на проблемите, кои се во нивен интерес.
„На тој начин, тие ќе имаат одговорност да ја градат и зајакнат граѓанската култура“, велат од ТВ ВИС.
Овој медиум емитува програма во југоисточниот регион, на границата со Грција и Бугарија, повеќе од 20 години, првично како локален, а во последните 10 години и како регионален медиум.
Во однос на проектот „Media for All“, Јанчева посочува дека обуката, интервенциите за изградба на капацитетите и менторството, им помогнале да стекнат нови знаења и искуства од медиумската сфера.
„Вреден придонес за успешна реализација на проектот, дојде од нашиот ментор. Благодарение на редовната комуникација, во комбинација со нивното искуство, насоки и идеи, проектот успешно се реализира“, нагласи Јанчева.
ТВ ВИС е еден од 11-те медиуми од Северна Македонија, кои се дел од проектот „Media for All“, кој е финансиран од Владата на Обединетото Кралство, а имплементиран од Британскиот совет, Фондацијата Томсон, БИРН и ИНТРАК, во сите земји од Западен Балкан.
