Регионалниот медиум, ТВ М, од Охрид, успешно го имплементираше проектот „Ти си твојот град“, чија цел е да ги доближи граѓаните до медиумот, охрабрувајќи ги да станат граѓани новинари.
Идејата е да се зголеми обемот на огласувачите, односно, да се зголемат приходите на медиумот, со зголемување на сообраќајот, досегот и видливоста на веб-страницата на ТВ М, од една, и гледаноста на програмата, со нудење содржина генерирана од публиката, од друга страна.
„Врз основа на строго дефинирани критериуми, граѓаните беа охрабрени да поставуваат видео и фотосодржини на профилите на ТВ М на социјалните мрежи, преку електронска пошта и на веб-страницата на медиумот, за теми што ги сметаат за важни и релевантни (инфраструктурни прашања, корупција, незаконски активности итн.)“, вели, Ирена Арнаудова, од ТВ М, додавајќи дека содржината од висока релевантност и важност, генерирана од корисниците, била дополнително покриена од новинарите на ТВ М.
Во подоцнежна фаза од проектот, 4 граѓани новинари, кои ќе покажат интерес за соработка, ќе добијат основна новинарска обука и стабилизатори (гимбали) и ќе започнат редовно да известуваат за страниците на социјалните мрежи на ТВ М.
„На овој начин, сите наши канали ќе добијат внимание, видливост и ќе привлечат нови огласувачи“, нагласи Арнаудова.
Досега ТВ М има добиено околу 100 фотографии и видеа, од кои 80 се избрани и објавени. Околу 15 случаи беа целосно развиени во новинарски прилози. Овој пристап резултираше со зголемен број на посети на нивната веб-страница и на профилите на социјалните мрежи.
„Да се биде дел од проектот „Media for All“, значи многу за нас. Знаењето и поддршката што ја добивме од експертите и од нашиот ментор, заедно со обуката и курсевите за е-учење, ни помогнаа дополнително да напредуваме во нашата работа и да испорачаме нови и свежи содржини, за нашите гледачи“, наведе Арнаудова.
ТВ М, како локален медиум, е основана во 1993 година. Со текот на годините стана независен медиум со препознатлив и угледен статус. Во 2014 година се трансформира во регионална ТВ станица, која емитува програма во Охрид, Струга, Вевчани и во Дебарца.
ТВ М од Охрид е еден од 11-те медиуми од Северна Македонија, кои се дел од проектот „Media for All“, кој е финансиран од Владата на Обединетото Кралство, а имплементиран од Британскиот совет, Фондацијата Томсон, БИРН и ИНТРАК, во сите земји од Западен Балкан.
