Регионалната телевизија од Гостивар, ТВ Глоби, започна со емитување на документарните емисии посветени на дијаспората. Емисијата ДиаСпора се фокусира на животните приказни, предизвиците во новите држави, како и врските со родниот град на иселениците од Гостиварско. Првата епизода, посветена на гостиварци кои работат и живеат во Швајцарија, беше емитувана во август.
„Ќе снимиме десет епизоди од емисијата ДиаСпора, а секоја емисија ќе биде долга околу 30 минути,“ рече Зоран Маџоски од ТВ Глоби додавајќи дека „втората епизода е во завршна фаза и се наоѓа во монтажа.“
Впечатоците после првата епизода се повеќе од позитивни. Како што истакна Маџоски „емисијата ќе има висока гледаност судејќи по првичните коментари и впечатоци од публиката.“
На основа на овие позитивни реакции и коментари ТВ Глоби сака да развие уникатен модел за монетизација. Имено, планираат да ја рекламираат емисијата на социјалните мрежи потенцирајќи дека истата може да се гледа само на одредени оператори. За возврат, очекуваат операторите да им дадат дел од претплатата од новите претплатници кои би биле добиени како резултат од заинтересираноста за новата емисија.
Како што истакнуваат од ТВ Глоби сите предуслови за успешно имплементирање на бизнис планот се тука. „Во моментов сме претежно фокусирани на промоција на нашата работа. Сакаме да ја зголемиме гледаноста што пак ќе резултира во поголем број реклами и развивање на долготрајни партнерства со компании,“ рече Маџоски.
ТВ Глоби е основана во 2013 година. Телевизијата може да се гледа на кабелските оператори во следниве три општини: Гостивар, Врапчиште, и Боговиње.