Пакет „Online media essentials“

Збогатете го вашиот медиум со три пакети урнеци, коишто се достапни бесплатно да ги преземете, приспособите и користите.

Подобрете ги заштитата на личните податоци, дигиталната безбедност и основните стандарди за онлајн медиуми со едноставните урнеци, коишто се достапни на сите локални и скриптни јазици.

Користете ги овие документи за да бидете сигурни дека се применуваат основните правни, технички и безбедносни стандарди во вашиот медиум.*

Приватност на податоците

Заштитата на приватноста на податоците на публиката, претплатниците, клиентите или вработените е клучна за секој медиум.

Прочитајте ги советите и преземете ги урнеците за два важни документи кои ќе ви помогнат да ја регулирате оваа важна област согласно законот, за да избегнете компромитирање на податоци или можни казни.

Политика на приватност

Преземете го и приспособете го овој образец за да се осигурате дека сите активности за собирање податоци во вашиот медиум се регулирани со закон.

Дали собирате сензитивни лични податоци од посетителите на вашата веб-страница и на кој начин? Дали вашите посетители се информирани за ова?

Секој кој собира и користи лични податоци како што се име и презиме, адреса на е-пошта или IP адреса, обврзан е со закон да ја информира својата публика, односно корисниците за тоа. Затоа, стандардно се практикува Политиката на приватност јавно да се објавува на веб-страниците на медиумите.

Приспособување: Фуснотите на документот содржат појаснување како да се приспособи овој урнек на потребите на конкретниот медиум. Оттаму, во секоја точка (наслов) неопходно е да се внесат информации коишто се релевантни за конкретниот оператор, вклучително информации за податоците коишто не се обработуваат. Откако ќе се добие конечната верзија на текстот со потребните информации, фуснотите треба да се избришат пред да се објави Политиката на приватност на веб-страницата на медиумот.

Употреба: Текстот Политика на приватност треба да биде јавно достапен на веб-страницата на медиумот.

Важни совети:

Урнекот за Политика на приватност пред вас е пример за тоа како медиумот може да ја опише обработката на личните податоци што ги собира преку својата веб-страница во рамките на својата политика на приватност. Насловите од овој пример ги следат задолжителните информации што операторот е должен да ги обезбеди согласно правилата на Општата регулатива за заштита на податоци (ЕУ) (ГДПР), односно General Data Protection Regulation (GDPR).
Доколку операторот не собира никакви лични податоци, препорачуваме да објави известување на веб-страницата во коешто ќе го наведе тоа.

Евиденција за активностите за обработка на лични податоци

Добијте јасен преглед на активностите и одговорностите во врска со собирањето и обработката на податоците во вашиот медиум со овој шаблон.

Дали знаете кој собира и обработува лични податоци во вашиот медиум, на кој начин и со која цел? Каде се чуваат и кој има пристап до податоците за вашите вработени, клиенти или претплатници?

Преземете ја и приспособете ја табелата за евиденција за активностите за обработка на лични податоци, со којашто ќе имате јасен преглед на активностите и одговорностите за сите процеси на собирање и обработка на податоци.

Приспособување: Пополнете ја и приспособете ја табелата дадена за пример, на начин да одговара на потребите и ресурсите на вашиот медиум. Опишете ги специфичните активности за обработка на лични податоци во секој ред. Користете онолку редови колку што ви се потребни, додека не ги наведете сите активности за обработка на лични податоци.

Употреба: Овој документ е за интерна употреба на медиумот.

Важни совети:

Евиденцијата за процесите со коишто контролорот (медиумот) обработува лични податоци не е директна обврска пропишана со ГДПР и законите коишто произлегуваат од неа. Меѓутоа, овие закони ја регулираат обврската на операторот да поседува документ наречен „Евиденција за активностите за обработка“.
Оваа евиденција, всушност претставува листа на активности со кои контролорот собира и користи некои лични податоци. Оттаму, може да се каже дека со изработка на список на процеси/активности за обработка на лични податоци користејќи ја, на пример, оваа табела - контролорот истовремено ги мапира своите активности за обработка на податоци, додека истиот документ може да послужи како евиденција за активностите за обработка (сите овие изрази се практично синоними).

Дигитална безбедност

Дигиталната безбедност е од клучно значење за секоја организација, особено за медиумите, бидејќи тие се стекнуваат со сензитивни информации.

Оттаму, се смета за добра практика да се поседуваат документи за интерна употреба коишто содржат различни организациски политики и процедури, како на пример, политика за лозинки, политика за користење и управување со е-пошта, безбедносен план, како и документ за проценка на ризик.

Политика за лозинки

Преземете го и користете го овој образец за да избегнете ризици од протекување, злоупотреба или губење на вашите онлајн сметки.

Дали знаете кој располага со лозинките на корисничките сметки на социјалните мрежи на вашиот медиум, односно со страниците на „Фејсбук“, „Инстаграм“, „ЛинкдИн“ или каналот на „Јутјуб“ на вашиот медиум? Дали сте сигурни дека тие лозинки се силни и безбедно зачувани и дистрибуирани меѓу вашиот тим?

Политиката за лозинки има за цел да им помогне на организациите/медиумите да создадат единствена политика за користење и управување со лозинки, со цел да се овозможат предвидливи и јасни процедури.

Политиката за лозинки им овозможува на медиумите и нивните тимови да обезбедат безбедно креирање, користење, чување и менување на лозинките, како и на основниот механизам за автентикација и заштита на ресурсите на организацијата.

Приспособување: Медиумите може да го приспособат овој урнек за да одговара на нивните потреби, ресурси и капацитети.

Употреба: Овој документ е за интерна употреба на медиумот.

Совет: Преземете и користете ја Политиката за користење и управување со е-пошта заедно со овој документ. Се препорачува прво да изготвите Политика за лозинки, а потоа да ги примените нејзините одредби за Политиката за користење и управување со е-пошта. Кога ќе ги изготвувате документите Проценка на ризик и Безбедносен план, не заборавајте да ги земете предвид овие две политики.

Клучни прашања коишто треба да се земат предвид:

Избегнувајте прекумерно регулирање: Политиката нека биде кратка и концизна, напишана без премногу детали и на разбирлив јазик. Долгите и детални документи коишто се напишани во административен и правен стил, голема е веројатноста дека никогаш нема да се применат во пракса.
Обезбедете обука: Помогнете им на вработените да ја разберат политиката и дајте им доволно време да вежбаат со користење на т.н. „менаџери за лозинки“ и да ги подобрат нивните практиките поврзани со лозинките. Вработените коишто имаат понапредни дигитални вештини нека ги едуцираат вработените коишто имаат послаби дигитални вештини.

Воспоставете јасни процедури: Проверете дали персоналот ги разбира потенцијалните ризици поврзани со пробивање и злоупотреба на лозинките и дали знае како треба да реагира во случај на ваков инцидент кога се загрозени лозинките на организациските ресурси.

Политика за користење и управување со е-пошта

Обезбедете го користењето и управувањето со професионалната е-пошта и поврзаните сметки во вашиот медиум со овој образец за политика.

Кој провајдер за е-пошта го користи вашиот медиум? Кој е одговорен за одржувањето, безбедноста и управувањето на корисничките сметки за е-пошта во вашиот тим?

Преземете и користете го урнекот за Политика за користење и управување со е-пошта за да овозможите користење и управување со службената е-пошта (т.е. пакетите за услуги за продуктивност што ги нудат давателите на услуги како што се „Гугл“ или „Микрософт“). Политиката за користење и управување со е-пошта им овозможува на медиумите и нивните тимови да се осигурат дека со сметките коишто се во сопственост на медиумот се управува и се користат на начин што ќе ги намали можните ризици по дигиталната безбедност.

Употреба: Овој документ е за интерна употреба на медиумот.

Совет: <Преземете и користете ја Политиката за лозинки заедно со овој документ. Се препорачува прво да изготвите Политика за лозинки за вашиот медиум, а потоа да ги примените нејзините одредби за Политиката за користење и управување со е-пошта. Кога ќе ги изготвувате документите Проценка на ризик и Безбедносен план, не заборавајте да ги земете предвид овие две политики.

Клучни прашања коишто треба да се земат предвид:

Избегнувајте прекумерно регулирање: Политиката нека биде кратка и концизна, напишана без премногу детали и на разбирлив јазик, и да не ги оптоварува секојдневните работни активности и спроведувањето на професионалните стандарди. Повторно, имајте предвид дека долгите и детални документи коишто се напишани во административен и правен стил,голема е веројатноста дека никогаш нема да се применат во пракса.
Обезбедете совет: Помогнете му на персоналот (вработените, практикантите, волонтерите) да ја разберат политиката и дајте им доволно време да разберат како и за кои цели можат да ја користат својата службена сметка на е-пошта штом ќе им се додели истата.

Воспоставете јасни процедури: Погрижете се да го информирате персоналот како функционира управувањето со адресите на е-пошта во медиумот, бидејќи тоа ќе им помогне да управуваат со нивните адреси на е-пошта на попредвидлив начин, што може да биде важно за нив доколку се одлучат да го напуштат медиумот.

Безбедносен план

Преземете го урнекот за да изготвите и воспоставите процедури во вашиот медиум за справување со закани по дигиталната безбедност и научете како да ги спречите ваквите закани.

Како се справува вашиот медиум со сензитивната комуникација со вашите извори? Дали знаете што треба да сторите и кого да повикате во случај веб-страницата на вашиот медиум да се соочи со сајбер-напад? Што ќе се случи доколку вашите канали за комуникација, сензитивни документи и други податоци протечат и бидат хакирани?

Приспособување: Сите мерки и совети дадени во урнекот за Планот за безбедност се со цел да ве посоветуваат и да ви послужат како пример. Медиумите може да го приспособат овој урнек за да одговара на нивните потреби, ресурси и капацитети.

Употреба: Овој документ е за интерна употреба на медиумот.

Совет: Преземете и користете ги урнеците за Политика за лозинки, Политика за користење и управување со е-пошта и Проценка на ризик заедно со овој документ. Овие три документи/политики се клучни за вашиот Безбедносен план и треба да се изготват пред да го изготвите Безбедносниот план. При евентуални промени во вашите политики, треба да се приспособи и Безбедносниот план.

Клучни прашања коишто треба да се земат предвид:

Не навлегувајте премногу и бидете подготвени за приспособување: Ниту најдеталниот план не може да ги опфати сите можни сценарија за закана по дигиталната безбедност. Затоа, медиумите треба да учат од искуството, било од нивното или од туѓото искуство, и да внимаваат на потенцијалните закани по нивните дигитални ресурси и техничка инфраструктура.
Обезбедете совети и обуки: Помогнете му на персоналот да ја разбере политиката и да ги научи чекорите што ќе ги направи како нив, така и медиумот, поотпорни на техничките напади кои доаѓаат однадвор, како и на заканите по безбедноста кои доаѓаат одвнатре.
Воспоставете јасни процедури за справување со инциденти: Проверете дали персоналот разбира што се очекува од него во случај на закана по дигиталната безбедност, на пример, што треба да биде неговата прва реакција, со кого да стапи во контакт (на пример, со колегите задолжени за управување со ИКТ инфраструктурата) и како да го изведе безбедно тоа.

Проценка на ризик

Преземете и користете го урнекот за да добиете подобар увид во техничките ресурси и инфраструктурата на вашиот медиум, потенцијалните ризици и закани, како и во слабостите.

Дали знаете каква е техничката инфраструктура на вашиот медиум? Дали знаете колку компјутери, лаптопи, мобилни уреди и опрема поседува, користи или има на располагање медиумот? Каков вид сервер се користи и дали постои можност дигиталните закани да се претворат во физички закани за капацитетите на вашиот тим или медиум?

Доколку се земе предвид дека постојано се менуваат безбедносните ризици во дигиталната средина, медиумите треба постојано да ги проценуваат нивните силни и слаби страни и да ги приспособуваат нивните политики и практики.

Употреба: Овој документ е за интерна употреба на медиумот.

Совет: Преземете го урнекот и направете Проценка на ризикот по дигиталната безбедност на практиките и капацитетите на вашиот медиум. Имајте предвид дека сите организациски политики/документи, како што се Политиката за лозинки, Политиката за користење и управување со е-пошта и Безбедносниот план, треба да се ревидираат доколку со Проценката на ризик се утврди дека има потреба од тоа.

Клучни прашања коишто треба да се земат предвид:

Бидете информирани: Следете ги трендовите поврзани со дигиталните напади и закани, особено оние што се насочени кон новинарите и медиумите, и бидете подготвени да ревидирате некои од мерките и политиките во вашиот медиум. Проверете дали персоналот е запознаен со потенцијалните опасности по дигиталната безбедност, со коишто може да се соочи, како во канцеларијата, така и при известување од терен.
Редовно ажурирање: Треба редовно да се прави проценка, на одредени временски интервали или во случај на закана по дигиталната безбедност. Ситуацијата може многу брзо да се промени за медиумите и треба да се размислува за потенцијалните ризици пред тие да предизвикаат посериозна штета.
Побарајте помош: Доколку не сте сигурни со какви ризици се соочува вашата организација и немате внатрешни капацитети, консултирајте се со надворешен експерт. Изберете експерт во којшто може да имате доверба, односно експерт со беспрекорен углед во медиумите и ИТ заедницата.

Стандарди за онлајн медиуми

Развојот на новиот медиумски екосистем, којшто започна со подемот на дигиталните средини, во голема мера ги промени традиционалните медиуми коишто применуваа систем на еднонасочна комуникација.

Актуелното медиумското законодавство не е во чекор со овие промени, па затоа е исклучително важно да се воспостават етички правила, особено за содржините коишто се објавуваат во интернет просторот којшто постојано се менува.

Импресум

Преземете го, уредете го и употребете го урнекот за импресум, со којшто ќе придонесете да се создаде култура на доверливост, одговорност и транспарентност во вашиот медиум.

Процедури за објавување медиумски содржини

Преземете ги и користете ги овие кратки насоки, коишто ќе ви помогнат јасно и транспарентно да наведувате заслуги за содржините на веб-порталот на вашиот медиум.

Насоки за транспарентна модификација на медиумските содржини

Преземете го и користете го овој урнек за да обезбедите транспарентно да се модификуваат или повлекуваат содржините објавени на веб-порталот на вашиот медиум.

*Достапните урнеци се одличен пример за добра практика за тоа како треба да се регулира одредена област. Тие се достапни да се преземат, приспособат и користат за изработка на документи, политики и процедури за медиумите. Фондацијата „Томсон“ не гарантира, односно не сноси одговорност за приспособувањата коишто ќе се направат во урнеците, ниту пак за нивната примена во пракса.
Пакетот „Online media essentials“ е создаден во рамките на проектот „Media for All“, којшто е финансиран од Владата на Обединетото Кралство, а го спроведуваат Британски совет, Фондацијата „Томсон“, BIRN и INTRAC.