Курсот е наменет за медиумските работници, со цел тие да се запознаат со процесите и начините на структурирање и водење на редакциите – без разлика дали се работи за мали или за големи редакции. Од самото запознавање со поимот конвергенција во медиумите, преку новите трендови во медиумската индустрија и примената на дигиталната технологија во производството на содржини, па сѐ до поглавјето за развивање на вештини.
Низ овој интерактивен курс, ве водат медиумски експерти, кои ќе ви помогнат самите да го изберете моделот на организација, што можете да го примените во локалната средина. Курсот се состои од 5 целини.
Во првиот дел ве запознаваме со основните поими и со новите трендови во медиумскиот свет. Ве запознаваме и со поимот конвергенција на медиумите и кои се степените на конвергенција што можете да ги примените, во зависност од медиумот и платформите на кои објавувате содржини. На овој начин ќе дознаете и што значи начелото „digital first“, во една модерно организирана редакција.
Во второто поглавје, ве водиме со светот на интегрираната редакција и ви даваме можност самите да исцртате нов модел на вашата интегрирана редакција, како и соодветно на тоа да ги прилагодите вашите работни процеси.
Во третото поглавје, зборуваме за редакциската култура и за примерите на добар начин на комуникација во редакцијата.
Во четвртиот дел, се запознаваме со мултимедијалното известување, со новите иновативни форми во новинарството и секако, во завршното поглавје, зборуваме за управувањето со ваквата редакција и создавањето на здрава работна средина.