Kursi ka për qëllim që profesionistët e medias të njihen me proceset dhe mënyrat e strukturimit dhe drejtimit të redaksive – qofshin të vogla apo të mëdha. Që nga vetë njohja me nocionin e konvergjencës në media, tendencat e reja në industrinë e medias, aplikimi i teknologjisë dixhitale në krijimin e përmbajtjes dhe krejt deri te kapitulli i zhvillimit të aftësive.
Nëpërmjet këtij kursi interaktiv, ju udhëhiqeni nga ekspertë të medias, të cilët do t'ju ndihmojnë të zgjidhni modelin e organizimit që mund të aplikoni në mjedisin lokal. Kursi përbëhet nga 5 njësi.
Në pjesën e parë do t'ju njohim me konceptet themelore dhe tendencat e reja në botën e medias. Gjithashtu do t'ju njohim edhe me nocionin e konvergjencëve mediatike dhe cilat janë shkallët e konvergjencës që mund të aplikoni në varësi të mediumit dhe platformave në të cilat publikoni përmbajtje. Në këtë mënyrë do të zbuloni se çfarë është parimi "digital first" në një redaksi të organizuar në mënyrë moderne.
Në kapitullin e dytë, do t'ju njohim me botën e redaksisë së integruar dhe jua japim mundësinë të vizatoni një model të ri të redaksisë suaj të integruar dhe të përshtatni proceset tuaja të punës në përputhje me të.
Në kapitullin e tretë, flasim për kulturën editoriale dhe për shembuj të komunikimit të mirë brenda redaksisë.
Në të katërtin, njihemi me raportimin multimedial, forma të reja novatore në gazetari dhe sigurisht, në kapitullin e fundit flasim për menaxhimin e një redaksie të tillë dhe krijimin e një ambienti të shëndetshëm pune.