OhridNews, независен информативен портал од крајезерскиот град Охрид, работи на воведување на нов производ/услуга на пазарот – интерактивна веб-страница која ќе ја информира, ангажира и едуцира пошироката јавност, за случувањата од областа на туризмот. Идејата е новата веб-страница да стане самоодржлива деловна единица, која ќе му обезбеди дополнителни приходи за OhridNews.
За жал, имплементацијата на проектот беше забавена поради компликациите што ги создаде пандемијата на КОВИД-19. „Во моментов сме во завршна фаза на имплементација. Ни треба уште малку време за да го финализираме проектот. Очекуваме се да биде готово до крајот на април“, вели, Горан Момироски, главен и одговорен уредник на OhridNews.
Новата веб-страница ќе се фокусира на регионот на Охрид и на Струга, во Северна Македонија, како и на заедниците околу Охридското Езеро во Албанија, и ќе обезбеди транспарентна и сеопфатна покриеност на туристичкиот сектор.
Медиумот ќе го информира читателот за постоечките атракции, настани, искуства, за расположливото сместување, за контакт информациите на институциите и службите за итни случаи итн. Исто така, низ атрактивни приказни, ќе ги едуцира читателите за историјата, за постоечките традиции и кулинарските специјалитети,.Воедно, читателите ќе ги пренасочува на релевантни веб-страници за резервации за настани, сместување и тури. Дополнителна мисија е подигнувањето на свеста за важноста на природните ресурси, со предлагање на начини како да се зачува животната средина, со свесно искористување на ресурсите.
OhridNews е првиот регионален онлајн портал во југозападниот регион на Северна Македонија. Од јануари 2007 година, овој онлајн портал има објавено над 130.000 вести, стории, колумни и видео емисии. Порталот е еден од 11-те медиуми од Северна Македонија, кои се дел од „Media for All“ грант шемата за развој на бизнисот. Проектот е финансиран од Владата на Обединетото Кралство, а имплементиран од страна на Британскиот совет, Фондацијата Томсон, БИРН и ИНТРАК, во сите земји од Западен Балкан.
