Citizens Channel në Tiranë prezantoi platformën e saj të mësimit online të quajtur Sheshit, e cila synon rritjen e kapaciteteve të gazetarëve të rinj, studentëve të gazetarisë, aktivistëve dhe qytetarëve për raportimin e çështjeve me rëndësi komunitare, përmes kurseve intensive online.
“Sheshit synon të bëje bashkë komunitetet rreth Citizens Channel. Duke ju ofruar njohuritë, këshillat dhe pajisjet e duhura për të avancuar në mënyrë efektive aktivizmin e tyre mbi çështje që lidhen me demokracinë, mjedisin, sundimin e ligjit dhe të drejtat e njeriut”, tregon Lorin Kadiu, Drejtues Ekzekutiv i Citizens Channel.
Moduli i parë i serisë prej tre trajnimesh, i fokusuar në Edukimin Mediatik, është tanimë online dhe gati për të mirëpritur pjesëmarrësit. Ky modul përbëhet nga 5 njësi që përcjellin një sërë njohurish teorike dhe praktike mbi të menduarin kritik gjatë konsumit të përmbajtjes mediatike. Dy modulet e tjera do të fokusohen tek gazetaria përmes telefonit celular (Mobile Journalism) dhe Mjetet e Aktivizmit Kreativ.
Plani afatgjatë i platformës është që të sigurojë vazhdimësinë, duke u kthyer në një shërbim të vetë-mjaftueshëm.
"Kjo është ajo që ne po synojmë – përmes një fushate marketingu online për “Mjetet e Gazetarit Qytetar” – një set pajisjesh që do të fuqizojë aktivistët dhe gazetarët e rinj në prodhimin e përmbajtjes vizuale cilësore. Do të kemi gjithashtu një fushatë me aksesorë të brenduar – që do të krijohen nga moduli jonë mbi Aktivizmin Kreativ”, thotë Kadiu.
Citizens Channel është pjesë e programit “Media for All”, një iniciativë e themeluar nga Qeveria e Mbretërisë së Bashkuar, zbatuar nga “British Council” në partneritet me BIRN, INTRAC dhe Fondacionin Thomson.
