Shpesh në biznesin mediatik është sfidë të prodhohen bashkëpunime të suksesshme mes gazetarëve, veçanërisht kur bëhet fjalë për gazetarë nga mediat e ndryshme. Edhe pa problemet e shumta me të cilat ballafaqohet gazetaria sot, ajo është edhe një profesion konkurrues, ku shumë herë mundësitë për bashkëpunim humbasin diku mes “kush e merr lajmin i pari” dhe “tregimi i kujt është më i mirë”.
Por nëse arrijmë ta kapërcejmë atë, dhe gjejmë kushtet e nevojshme për mbështetje dhe bashkëpunim, mund të shohim se disa nga tregimet më të mira gazetareske në biznesin mediatik lindin nga bashkëpunimi mes gazetarëve apo ekipeve gazetareske. Nëse kjo bëhet edhe mes gazetarëve nga qytetet, rajonet apo vendet e ndryshme, rezultatet е tregimeve të gazetarisë hulumtuese me cilësi të lartë mund të jenë të pabesueshme.
Ekziston një hapësirë e madhe për përmirësim dhe zhvillim mediatik kur bëhet fjalë për forcimin e lidhjeve ndërmjet gazetarëve hulumtues dhe gazetarëve vendas apo gazetarëve hulumtues vendas. Pra, shumë tregime, apo shumica prej tyre, janë shkruar për problemet dhe sfidat me të cilat përballet kryeqyteti, dhe shumë gjëra që kanë rëndësi në rajone të tjera, ose qytete dhe fshatra më të vegjël injorohen ose margjinalizohen në media. Bashkëpunimet e mira me gazetarët vendas dhe mediat lokale mund t'i ndryshojnë këto trende dhe të ofrojnë perspektiva të reja të freskëta me tregime të rëndësishme që kanë rëndësi për publikun.
Forcimi i lidhjeve me gazetarët vendas
Rritja e kontakteve dhe lidhjeve me gazetarët vendas është shumë e dobishme për krijimin e tregimeve të mira hulumtuese, por edhe për rrjetëzim dhe bashkëpunim të mirë.
Gazetarët vendas dinë shumë për ngjarjet në qytetin apo rajonin e tyre dhe shumë herë kanë informacione më të freskëta se ata që nuk punojnë dhe jetojnë atje.
Nëpërmjet takimeve të rregullta, mbledhjeve dhe ngjarjeve apo iniciativave joformale, kontaktet midis gazetarëve vendas dhe ato hulumtues mund të lulëzojnë dhe marrëdhëniet mund të ndërtohen, duke formuar besim për punën e ardhshme. Këto lidhje mund të jenë një terren mbi të cilin ndërtohen tregimet apo projektet e ardhshme, ku gazetarët vendas përfshihen më shumë në hulumtime apo analiza për një sërë çështjesh të rëndësishme në shoqërinë tonë.Vizita e gazetarëve vendas dhe mediave lokale për të kuptuar më mirë sfidat që ekzistojnë është gjithashtu shumë e rëndësishme për çdo gazetar hulumtues që dëshiron të krijojë më shumë lidhje dhe të përmirësojë punën e tij.
Përfshini në punë gazetarë të rinj nga qytete të tjera.
Vitet e fundit, në organizatën tonë mediatike PINA, kemi konstatuar se është me vlerë të madhe për rininë, për gazetarinë dhe për shoqërinë civile, gjetja dhe përfshirja e më shumë gazetarëve të rinj në procesin e punës dhe në tregimet që bëjmë. Kjo vlen jo vetëm për gazetarët e rinj që punojnë në kryeqytet, por edhe për ata që jetojnë në qytetet e tjera. Nëpërmjet mentorimit dhe punës me këta të rinj në media, ne shohim se përvoja vërtet i ndryshon dhe i ndërton si gazetarë, por gjithashtu na ndihmon edhe neve të dalim me tregime dhe përmbajtje të reja që nuk do t'i kishim nëse ata nuk do të raportonin për të. Ne punojmë me gazetarë të rinj duke u ofruar atyre mundësi për mentorim dhe punë praktik bashkë me raportim për tregimet mbi të cilat ata po punojnë, por gjithashtu i vendosim ata në ekipe që përfshijnë një gazetar dhe një mentor tjetër. Propozimet ndonjëherë vijnë nga ana jonë, por shumë herë gazetarët vendas japin ide të shkëlqyera për tregime që fokusohen mbi sfidat e rëndësishme për njerëzit që jetojnë atje.
Është mirë kur ka hapje ndaj një bashkëpunimi të tillë me mediat lokale, por duhet të kemi parasysh gjithashtu se gazetaria e pavarur ka tendencën drejt bashkëpunimit, kështu që ne mund të kërkojmë partnerë midis gazetarëve vendas, shumica e të cilëve janë gazetarë të pavarur. Të gjitha këto mundësi mund të përmirësojnë bashkëpunimin mes kolegëve në gazetari dhe të ndikojnë jo vetëm në përmirësimin e marrëdhënieve mes gazetarëve, por edhe në ngritjen e cilësisë së gazetarisë në përgjithësi.
