RTV Puls, një media lokale nga Shillova, prodhonte shfaqje live për pesë komuna rurale në Kosovë duke u fokusuar tek potencialet e tyre për turizëm lokal dhe për rritjen e ndërgjegjësimit në lidhje me sfidat kryesore me të cilat përballen banorët e tyre. Programi i këtij televizioni synonte t’i përfaqësonte më mirë pesë komunat me shumicë serbe në Kosovë (Shtërpcë, Kllokot, Partesh, Novobërdë, dhe Ranillug).
Në sajë të ndihmës nga Projekti “Media for All” (Media për të gjithë), RTV Puls nisi programin televiziv të drejtpërdrejtë Eto nas kod vas / Më pranë jush duke përdorur një risi, një Automjet Transmetimi nga Terreni (studio lëvizëse), në hyrje të ndërtesave të komunave të vogla dhe në pikat më të njohura në këto komuna.
“Nuk pritëm gjatë për vlerësimet nga audienca. Pas shfaqjes së dytë morën një sërë komentesh pozitive me theks të veçantë te kapacitetet teknologjike dhe njerëzore për të prodhuar përsosmërisht shfaqje live që zgjasin rreth 60 deri në 70 minuta secila,” tha Stanko Pevac, Drejtor Projekti në RTV Puls.
Shillova me pak më shumë se 1,200 banorë është fshati më i madh në komunë dhe RTV Puls me rreth njëzetë të punësuar është punëdhënësi më i madh në komunë. Dhe jo vetëm kjo. Falë edhe licencës për transmetim rajonal, programi i këtij televizioni mund të shihet jashtë rajonit të Gjilanit, në të gjitha komunat fqinje dhe përmes rrjeteve të operatorëve kabllorë mund të shihet nga pothuajse çdo banor në Kosovë.
“Misioni ynë është të jemi një burim i besueshëm informimi për komunitetin serb në Kosovë si dhe për banorët e tjerë serbishtfolës. Në këtë drejtim, RTV Puls po zhvillon produksionin e vet solid, duke i dhënë prioritet lajmeve, reportazheve dhe programeve vendore në mbarë Kosovën si dhe një programi të pasur kulturor dhe artistik që synon ruajtjen, zhvillimin dhe promovimin e gjuhës serbe dhe trashëgimisë kulturore të komunitetit serb në Kosovë”, thonë nga RTV Puls.
Kjo media u krijua në vitin 2001 si televizion i drejtpërdrejtë – DТV (Televizioni për Fëmijë), dhe në vitin 2004 u riemërtua në RTV Puls duke përshtatur skemën programatike të saj në një program me format të përgjithshëm.