TV Korça dhe Radio Korça, degët lokale të transmetuesit publik në Shqipëri, kanë funksione shumë të rëndësishme dhe gëzojnë nivel të lartë besimi në komunitetin e tyre që ndodhet në juglindje të vendit. Kjo është një nga konstatimet më të rëndësishme të Sondazhit për Perceptimin dhe Madhësinë e Audiencës, si pjesë e Projektit “Media për të gjithë”.
TV Korça ka arritur tregues shumë të mirë audience (ditore, javore dhe shtrirjen maksimale) në një mjedis shumë konkurrues dhe madje është renditur edhe para disa stacioneve kombëtare (p.sh., RTSH, Vizion+ dhe Ora TV). Po ashtu, TV Korça ka një ndërgjegjësim të madh për markën e saj dhe konsumin e medias dhe pozicionohet si një nga burimet kryesore të informacionit për qytetarët që jetojnë në këtë pjesë të Shqipërisë.
Nga ana tjetër, Radio Korça është stacioni kryesor në rajon me treguesit më të lartë të audiencës dhe konsiderohet edhe si burim parësor informacioni për dëgjuesit radiofonikë në Korçë.
Një tjetër hulumtim evidentoi se RTSH Korça është mjaft e ndjeshme për çështjet gjinore duke pasur të punësuar një numër të barabartë mes të dy gjinive si dhe tregon paanshmëri në pjesëmarrjen e grave gjatë raportimeve të rregullta. Po ashtu, RTSH Korça ia ka dalë me sukses të shmangë stereotipizimin gjatë raportimit për dhunën me bazë gjinore. Stereotipet nuk përdoren as për të përshkruar imazhin e pakicave.
RTSH Korça është pjesë e Programit “Media për të gjithë” , projekt i financuar nga Qeveria e Britanisë së Madhe, dhe që po zbatohet nga Këshilli Britani në partneritet me BIRN, INTRAC dhe Fondacionin Thompson. Programi “Media për të gjithë” mbështet mediat në të gjithë Ballkanin Perëndimor duke ofruar mentorim nga ekspertë, trajnime dhe mbështetje financiare për të prodhuar dhe dhënë një gamë të gjerë përmbajtjeje për të gjithë qytetarët.