Të qëndisësh motivet tradicionale por edhe të krijosh punime të imëta në filigran është një punë sa e vështirë aq edhe e bukur. Në Shkodër, qytet në veriperëndim të Shqipërisë, janë me dhjetëra artizanë që i kanë përkushtuar jetën këtij profesioni.
Një prej tyre është edhe “artizania e shqipes”, Ardjana Handraj, që është edhe një ndër mjeshtret e punimit të simbolit të shqiponjës së flamurit. Janë me qindra shqiptarë brenda dhe jashtë vendit që duan ta kenë këtë simbol pranë tyre.
Mjeshtrja e shqipes na thotë: “I jam përkushtu vetëm shqipes dhe di me e punu. Jam krenare që kena këtë simbol. Kur i vlerësojnë punët e mia me shqipe, ndihem shumë krenare,” përfundon Ardjana.
Star Plus Tv, një televizion lokal në qytetin verior të Shkodrës, e kuptoi se kjo punë artizanale është një mundësi për krijim të ardhuash duke rritur shikueshmërinë e tyre, por edhe si një formë për promovimin e trashëgimisë kulturore.
Drejtori i Star Plus TV në Shkodër, Ardi Hoti, i dërgoi një kërkesë Bashkisë së Shkodrës ku i kërkonte të njihej me sfidat e mëdha të këtij komuniteti e për t’i ndihmuar në çeljen e një tregu të dedikuar për ta.
“Gjatë këtyre muajve kemi ndjekur punën e artizanëve në Shkodër, e cila është shumë e bukur për t’u fshehur apo për të mos u promovuar. Ata janë një vlerë e madhe e qytetit dhe e trashëgimisë sonë kulturore, e cila duhet të promovohet patjetër,” përfundon zoti Hoti.
Kështu, më pas u bënë një sërë artikujsh dhe lajmesh që fokusohen në sfidat me të cilat përballen artizanet por edhe për t’u promovuar si një potencial turistik. Star Plus TV synon t’i vijë në ndihmë qindra artizanëve por edhe t’i japë vlerë punimeve të tyre.
I regjistruar në vitin 2010, Star Plus TV është i vetmi televizion lokal që transmeton në platformën satelitore DigitAlb. Kjo media ka të punësuar 16 punonjës me kohë të plotë dhe 9 të tjerë me kohë të pjesshme.