Mediat e vogla priren të luftojnë për të siguruar mbështetje financiare për politikën e tyre të lajmeve, gjë që shpesh i detyron të kërkojnë financime nga jashtë. Por ka një alternativë më të qëndrueshme dhe më të mirë. Siç kemi theksuar në artikullin e kaluar, mediat mund t’i dalin zot vetes së tyre për sa i përket burimeve duke krijuar redaksinë me markë të dallueshme nga të tjerët. Kjo u jep mundësive këtyre redaksive të nxjerrin të ardhura nga reklamimi i aktiviteteve të markës së tyre, aktivitete që nuk fokusohen më vetëm tek shitja e produkteve apo shërbimeve në mënyrë të drejtpërdrejtë, por më shumë duke u përkujdesur për përdoruesit e tyre dhe duke krijuar komunitete besnike.
Gjithsesi, mediat që krijojnë një redaksi të markës duhet të jenë të kujdesshëm në zgjedhjen e klientëve me të cilët do të punojnë. Këto media duhet t’i qëndrojnë besnikë standardeve të larta etike të gazetarisë në mënyrë që të mos komprometojnë besueshmërinë e tyre dhe të vënë në rrezik reputacionin që kanë.
Kjo do të thotë që mediat duhet të bashkëpunojnë vetëm me markat që respektojnë vlerat e mediave.
Prandaj, një markë që është për respektin ndaj mjedisit është klienti i përsosur për një media që shpesh raporton ngjarje për ndotjen dhe ndryshimet klimatike.
Po ashtu, për të qenë të sigurt, duhet bërë një dallim i qartë mes gazetarëve që mbulojnë lajmet dhe prodhuesve të përmbajtjes të angazhuar në redaksinë e markës. Përndryshe, besueshmëria e mediave mund të vihet përsëri në rrezik nëse rrjedh informacioni i debatueshëm që cenon integritetin e markës që e ka porositur. Në këtë rast, media mund të pësojë të njëjtin ‘shuplakë’ si vetë marka, me shumë gjasa duke humbur një pjesë të konsiderueshme të komunitetit besnik të të dy palëve.
Redaksitë dhe redaksitë e markave: Dy anë të së njëjtës medalje
Nëse tatëpjeta është aq e rrëshqitshme, atëherë pse të shqetësohemi edhe për krijimin e një redaksie marke? Përgjigja është e thjeshtë.
Edhe nëse e lëmë mënjanë faktorin financiar, që është tashmë një avantazh mjaft i madh, ka përfitime të tjera që duhen marrë parasysh.
Së pari, redaksia e markës ka nevojë për producentë vizualë, të tillë si redaktorë video, grafik dizajner, teknikë montazhi videosh dhe komentatorë vizualë. Nga punësimi ose marrja me kontratë nga jashtë i këtyre personave aq të nevojshëm përfiton jo vetëm departamenti i redaksisë së markës, por edhe media në përgjithësi, sepse këta mund të rrisin vlerën e shtuar të lajmeve të prodhuara.
Dhe, së dyti, redaksia e markës ka nevojë edhe për ekspertë marketingu, apo të paktën njerëz me përvojë të konsiderueshme në marketing. Roli i tyre në redaksitë e markave është i paçmuar, sepse ata mund të përkthejnë në përmbajtje me cilësi të lartë nevojën e madhe për publicitetit duke shfrytëzuar politikën e lajmeve, duke mbivendosur një produkt ose shërbim në mënyrë indirekte me përmbajtje edukative, informative dhe/ose argëtuese. Në një botë ku pjesa më e madhe e konsumatorëve janë lodhur me truke të konsumuara të reklamave, strategji të tilla indirekte marketingu mund të bëjnë mrekulli për forcimin e komunitetit të një marke.
Tashmë këtë qasje po e përdorin disa marka të fuqishme. Një shembull i tillë është Mercator - shitës me pakicë i madh në rajonin e Ballkanit Perëndimor, i cili ka krijuar platformën e vet të përmbajtjes të quajtur M Soseska. Platforma ofron përmbajtje me video me vlerë argëtuese dhe praktike, duke mbuluar tema të tilla si gatimi, stërvitja, kujdesi për shtëpinë, lojëra, si dhe intervista me individë të profilit të lartë. Në platformë shtohet rregullisht përmbajtje e re me vendosjen e produktit në mënyrë të integruar me mençuri dhe modesti.
Edhe BMW është një tjetër shembull i mirë. Gjigandi i makinave, që ka prodhuar automjete me emër të madh për dekada me radhë, kohët e fundit ka ndryshuar tërësisht faqen e vet ndërkombëtare.
Në vend të një modeli të ndërtuar dhe të orientuar drejt shitjes, BMW krijoi një portal lajmesh për entuziastët e makinave dhe individët që vlerësojnë stilin e jetës të përfaqësuar nga marka gjermane. Edhe pse shitësve tradicionalë kjo gjë mund t’ju duket si e pakuptimtë, produktet e kompanisë nuk përfshihen as në faqen hyrëse, por në një nënfaqe të aksesuar përmes menysë së lundrimit.
Përfundimi është se të gjitha markat që duan të merren me kanalet e tyre mediatike duhet ta fusin dorën thellë në xhep për të siguruar buxhete të konsiderueshme për krijuesit e lajmeve në vetë redaksi apo për ata të jashtëm për prodhimin e përmbajtjes së tyre. Meqenëse mediat tashmë kanë shkrues lajmesh, ato kanë një avantazh të konsiderueshëm në shfrytëzimin e mundësive të tilla. Fatmirësisht, krijimi i një shërbimi i redaksisë së markës nuk duhet të jetë i vështirë për një media, duke qenë se organizimi i punës është praktikisht i njëjtë me atë të redaksisë multimediale të çdo medie serioze.
Organizimi: Pjesët e figurës
Pra, çfarë i duhet një medie për të krijuar një redaksi marke?
T’i marrim gjërat me radhë duke filluar nga ato më të nevojshmet. Një nga gjërat më të domosdoshme është një hapësirë e madhe fizike me ndarje të veçanta që do të përdoren për kryerjen e detyrave të caktuara. Në mënyrë ideale, individët që bëjnë kërkime dhe prodhojnë materiale duhet të ndahen nga redaktorët e videove dhe duhet të krijohet edhe një dhomë e veçantë ku ekipi mund të mblidhet për takime, diskutime, mbledhje me Zoom, dhe për rrahje mendimesh për çështje të ndryshme.
Një tjetër copëz kryesore në gjëzën e panoramës së redaksisë së markës janë profilet e punonjësve. Përveç një eksperti marketingu, që është i domosdoshëm në çdo kompani që shet produkte ose shërbime, profili i parë i nevojshëm është një producent ekzekutiv i arsimuar dhe kompetent. Ky person është baza e funksionimit normal të punës. Është pikërisht ky person ai që përkthen në gjuhën e producentëve krijues atë që shet eksperti i marketingut. Ai bën të mundur që marketingu t’i vendosë çmimin e duhur dëshirave të klientit. Dhe, së fundi, është personi përgjegjës që informon producentët krijues se sa kohë kanë dhe sa thellë mund t’i futen një projekti të caktuar duke u bazuar në buxhetin që u është vënë në dispozicion.
Një rol tjetër i rëndësishëm në një redaksi marke është ai i prodhuesit (producentit) të përmbajtjes. Dhe bazuar në ngarkesën e punës, mund të nevojiten më shumë se një producent përmbajtjeje. Producenti i përmbajtjes duhet të jetë i aftë të parashikojnë se si do të dalë çdo video, blog ose histori multimediale në kanale të caktuara që dëshiron të përfshijë në komunikimin e tij klienti. Ai/ajo duhet të jetë i/e aftë të bëjë hulumtime, të krijojë koncepte dhe të hartojë skenarë për përmbajtjen e videove.
Së fundi, ajo që i duhet një redaksie marke janë njerëzit që mund ta sjellin në jetë çdo koncept apo skenar. Në varësi të llojit të përmbajtjes që redaksia e ardhshme e markës synon të prodhojë, në këto profile punonjësish bëjnë pjesë kameramanët, teknikët e ndriçimit, redaktorë video, grafistë, dhe teknikë montazhi. Sa më i larmishëm të jetë ekipi i prodhimit, aq më shumë projekte do të jetë në gjendje të marrë dhe të bëjë redaksia e markës.
Praktika në Ballkan: Vidi Vaka nga Maqedonia e Veriut
Mediat që tashmë kanë të krijuar ekipe multimediale kanë një avantazh të madh, sepse ato kanë aktualisht burimet e nevojshme të brendshme për të prodhuar përmbajtje multimediale. Një shembull i tillë në Ballkanin Perëndimor është Vidi Vaka. Kjo medie maqedonase ka aktualisht një ekip teknikë videosh që prodhojnë lajme së pari për media sociale, kështu që medias i mungojnë vetëm disa profile punonjësish për të krijuar redaksinë e saj të markës. Kemi punuar së bashku për përmirësimin e biznesit të saj dhe, deri tani, gjithçka po shkon sipas planit:
- Media ka gjetur një ekspert marketingu dixhitale, që përgatit formatet e përmbajtjes për klientët e saj (të ardhshëm). Në të njëjtën kohë, eksperti punon edhe për përmirësimin e përmbajtjes së lajmeve Vidi Vaka, që tashmë po prodhon rezultate premtuese. Thjesht vetëm me një numër të vogël lajmesh, Vidi Vaka ka thyer të gjitha rekordet e mëparshme dhe tashmë lakmohet nga konkurrentët. Ndër të tjera, disa nga këto histori kanë arritur pothuajse te çdo përdorues Facebook në Maqedoninë e Veriut dhe historitë e saj janë përkthyer duke mbuluar tema rajonale për të arritur te një pjesë e admirueshme e publikut serb, që më parë nuk e njihte fare këtë media maqedonase.
- Kjo media ka punësuar edhe një ekspert shitjesh, i cili krijon oferta dhe evidenton nevojat e tregut. Bazuar në këto analiza, Studioja televizive e Vidi Vaka ka shfrytëzuar njohuritë që ka për prodhimin e informacionit për të zhvilluar një produkt të ri - një histori interaktive për aktivitetet e markës së punëdhënësve në kompani të teknologjisë së informacionit. Ishte me rëndësi që ata krijuan vetëm NJË produkt të specializuar, i cili ishte përshtatur posaçërisht për segmentin e tregut - edhe pse media e bëri një gjë të tillë duke u bazuar në përvojën e mëparshme. Vetëm pasi të ketë parë rezultatet dhe analizat e shitjeve, media do të jetë në gjendje të krijojë produktin e ardhshëm. Pavarësisht kësaj, kompanitë ende mund të porosisin nga kjo media me qendër në Shkup histori me video ose seri dokumentarësh me marka të imazheve. Në fund të fundit, ky është avantazhi i tyre konkurrues për një periudhë të gjatë kohore.
- Në kohën e përfundimit të këtij artikulli, kjo media mori në punë një producent përmbajtjeje, që do të punojë me përmbajtjen e markës. Kjo është vendimtare, gjë që e kemi diskutuar shumë në simulimet me situata marketingu të jetës reale dhe në seminare, sepse nuk duam të komprometojmë besueshmërinë e gazetarëve në ekip. Dhe duke parë sesi historitë e tyre kanë arritur te një numër i konsiderueshëm njerëzish që i besojnë raportimit nga mediat e pavarura, kjo është e vetmja rrugë që duhet ndjekur. Në të ardhmen, diskutimet tona do të vazhdojnë në këtë drejtim. Grupi i gazetarëve duhet të mbetet “i shenjtë” dhe nuk duhet të harrojmë kurrë se redaksia e markës është këtu vetëm për të siguruar që ekipi i gazetarëve të ketë burime të mjaftueshme për të përmbushur detyrën e tij ndaj publikut.
Shumë media - veçanërisht ato që nuk kanë ekip multimedial - ndoshta do t’u duhet të bëjnë një investim edhe më të madh dhe të punësojnë ose nënkontraktojnë një numër më të madh punonjësish me profile të reja. Por, siç e kemi shpjeguar më sipër, kjo nuk është arsye për të hequr dorë. Të kesh këto profile në një redaksi (marke) sigurisht që do të dalin për mirë dhe do të shlyhen në planin afatgjatë si në aspektin e të ardhurave ashtu edhe në aspektin e cilësisë së lajmeve të prodhuara.
Funksionimi: Bashkëpunimi i ngushtë është çelësi
Me çdo projekt të ri në horizont, njerëzit e parë që duhet të vijnë janë prodhuesit dhe studiuesit e përmbajtjes sonë. Janë pikërisht ata që duhet të nxjerrin në pah se për çfarë ka nevojë klienti ynë (i mundshëm), të bëjnë kërkimet e nevojshme dhe të propozojnë zgjidhjen optimale për klientin në fjalë. Duhet të kemi parasysh se klientët shpesh e kanë një ide se çfarë i mungon komunikimit të tyre, por përgjithësisht nuk arrijnë të kapin të gjithë pamjen në planin gjithëpërfshirës. Në vend që të përqendrohen në pikat e ndjeshme të konsumatorëve të tyre, klientët normalisht japin pikëpamjet e tyre. Pra, duhet t’i përmbahemi zgjidhjes që propozojmë ne edhe nëse nuk është plotësisht e harmonizuar me idenë fillestare të klientit. Në fund të fundit, puna jonë është të kënaqim përdoruesin përfundimtar, dhe jo klientin!
Këto fazat e para të bashkëpunimit janë zakonisht më kërkueset dhe konsumojnë shumë kohë. Kështu, mund të na duhet të bëjmë disa takime para se të jemi në gjendje të marrim të gjitha informacionet që na nevojiten dhe të arrijmë në pika të përbashkëta me klientin tonë. Por është me rëndësi që kjo gjë të bëhet patjetër. Jemi pikërisht ne ekspertët në fushën e komunikimit të përmbajtjes. Në fund të fundit, nëse klienti ynë do të kishte ekspertizë në këtë fushë, ai do ta prodhonte vetë përmbajtjen dhe nuk do të vinte në redaksinë tonë të markës për këtë punë.
Pasi të kemi mbaruar me mbledhjet informuese dhe me pyetje-përgjigje, duhet të mbledhim ekipin që do të punojë me projektin. Duhet të kemi parasysh se çelësi për prodhimin e përmbajtjes me cilësi të lartë në një redaksi marke është qasje me shumë disiplina.
Arsyeja që kemi gjitha ata punonjës me profile të ndryshme nuk është vetëm të shoqërojmë projektin në të gjitha fazat e nevojshme brenda në redaksi, por përkundrazi që të përfshijmë të gjitha profilet në secilin hap të procesit.
Prandaj, është me rëndësi të madhe që pjesëtarët e ekipi që është ngritur për një projekt të bashkëpunojnë ngushtë me njëri-tjetrin. Për shembull, kur producenti i përmbajtjes shkruan një përmbledhje, ai/ajo duhet të diskutojnë çdo animacion me teknikun e videos dhe grafistin. Ka dy arsye për këtë. Së pari, producenti mund të mos e dijë se sa e vështirë mund të jetë dhe sa kohë do të nevojitet për të bërë animacionin që parashikohet për skenarin. Dhe, së dyti, producenti dhe grafisti mund të gjejnë një zgjidhje më të mirë së bashku sesa mund të krijonte producenti i përmbajtjes i vetëm pa rrahur mendime me anëtarët e tjerë të grupit. Në këtë mënyrë, bashkëpunimi i ngushtë do të garantojë që projektet tona të jenë realizuar mirë si në aspektin e kostos dhe të kohës ashtu edhe për sa i përket cilësisë së produktit përfundimtar.
Por si mund të sigurojmë projektin e parë për redaksinë e markës?
Menaxhimi i një redaksie marke: Hapa të vegjël drejt një qëllimi të madh
Kur të nisim rrugëtimin me redaksinë e markës, duhet të fillojmë hapa të vegjël, por me synime të mëdha. Me fjalë të tjera, të mendojmë në mënyrë strategjike. Mund të fillojmë duke shoqëruar një artikull lajmi nga vendi në platformat dixhitale të vetë medias me një video që flet për lajmin dhe të vazhdojmë në këtë drejtim. Gradualisht, do të arrijmë në një pikë ku do të jemi në gjendje t’i japim një projekt të mirë klientit apo, akoma edhe më mirë, vetë klienti mund të na kontaktojë nëse has në përmbajtjen tonë. Mund t’i propozojmë që t’i krijojmë platformën e përmbajtjes që dëshiron. Si alternativë, mund t’i bëjmë edhe një fushatë komunikimi të vazhdueshëm të përmbajtjes me informacione të botuara çdo javë në kanalet e mediave sociale të vetë klientit.
Pavarësisht rrugës që vendosim të ndjekim me redaksinë e markës, duhet të mbajmë mend se e gjithë ideja e krijimit është të sigurojmë një burim të qëndrueshëm të ardhurash për median tonë dhe të rrisim vlerën e shtuar të lajmeve që prodhojmë. Duhet të jemi të hapur për të pasur një redaksi marke dhe, ajo që është edhe më e rëndësishmja, ta vlerësojmë këtë redaksi po aq sa vlerësojmë dhe duam edhe gazetarët tanë. Sepse, këta të fundit janë klientët e parë dhe më të rëndësishëm të redaksisë së markës. Prandaj, të sigurohemi që të bëjmë më të mirën kur prodhojmë për klientët infografikë, histori me video dhe përmbajtje të markës së punëdhënësit.
Mediat kanë ende fuqi të madhe në shoqërinë e sotme. Përveçse kanë një shtrirje tejet të gjerë, mediat kanë edhe një potencial të pakufizuar për të ndikuar te të tjerët. Pra, sa herë që një reklamues apo një vendimmarrës kryesor nga platforma publike evidenton një media që jo vetëm prodhon lajme cilësore, por ka edhe një fushatë të qëndrueshme komunikimi me përmbajtje tërheqëse, ata do të duan të njëjtën gjë për klientin, kompaninë apo markën e tyre.
Është përgjegjësia kryesore e medias të edukojë njerëzit.
Dhe tani është koha për të edukuar reklamuesit dhe për t’i bërë të ditur atyre se ka ikur ajo kohë kur humbnin para në reklama të shtrenjta pa asnjë përmbajtje. Ka ardhur koha që të gjithë, përfshirë këtu edhe markat e mëdha, të fillojnë të prodhojnë përmbajtje origjinale.
Mund të mendojmë se ndonjëherë nuk jemi në gjendje të arrijmë në pika të përbashkëta me një klient të mundshëm, por nuk ka absolutisht asgjë të keqe me një situatë të tillë. Ajo që ka rëndësi është të mbajmë qëndrimin e duhur dhe të qëndrojmë në një pozicion që është në përputhje me ekspertizën dhe vlerat thelbësore të medias.
