Në sajë të qasjes gjithëpërfshirëse dhe shumë-platformëshe RTV Teuta nga Ulqini, po shënon rritje të vazhdueshme të audiencës në platformat e saj dixhitale. “Të gjitha të dhënat statistikore tregojnë një rritje të dukshme të vizibilitetit, shikueshmërisë dhe angazhimit të audiencës në të gjitha kanalet dixhitale,” tha Drejtoresha Ekzekutive e TV Teuta, Ilmira Lika.
Të dhënat tregojnë se në gjashtë muajt e fundit, që nga fillimi i projektit, RTV Teuta ka 1,500 abonentë të rinj në kanalin YouTube. Falë kësaj, për herë të parë kjo media ka nxjerrë të ardhura nga videot në YouTube. Të dhënat nga Facebook tregojnë për një rritje me 50% të numrit të ndjekësve, ndërkohë që shikueshmëria e faqeve të saj u rrit me 184%. Shikueshmëria e faqes TV Teuta në Instagram u rrit me një shifër të pabesueshme prej 418%.
“Para se të zbatohej projekti, ne si media nuk kishim vizion të qartë dhe strategjik në lidhje me kanalet tona në platformat sociale. Falë bashkëpunimit të ngushtë me ekspertët e projektit, arritëm të rrisim shikueshmërinë tonë dhe të tërheqim më shumë audiencë,” tha Lika.
Këto arritje janë si rezultat i disa faktorëve. Më kryesorja është mbështetja e personalizuar për hartimin e një plani biznesi dhe për gazetarinë me shumë platforma. Falë kësaj, TV Teuta në ditët e sotme fokusohet në transmetimin e drejtpërdrejtë dhe pasurimin e vazhdueshëm çdo ditë të faqes së internetit dhe kanaleve të mediave sociale me përmbajtje cilësore. Po ashtu, kjo media i kushton vëmendje të veçantë diasporës duke prodhuar dokumentarë që fokusohen në nevojat e tyre.
“Ideja jonë është të krijojmë një portal modern dygjuhësh në internet. Një pjesë integrale e portalit në internet do të ishte një aplikacion përmes të cilit shikuesit dhe dëgjuesit tanë mund të ndjekin programet tona televizive dhe radiofonike në internet, pavarësisht nëse ndodhen në Mal të Zi apo kudo tjetër në botë (shtetas nga Mali i Zi që jetojnë jashtë vendit, ata që udhëtojnë, dhe të gjithë të tjerët që janë të interesuar),” tha Lika.
Faqja e re në internet dhe aplikacioni, së bashku me qasjen strategjike për gazetari shumë-platformëshe, duhet të rrisin edhe më shumë trendin pozitiv. RTV Teuta u krijua në vitin 2003 dhe është media e parë dygjuhëshe në Malin e Zi, që transmeton programet e saj në gjuhën shqipe dhe atë malazeze.
