Transmetuesi publik lokal nga Gjirokastra, një qytet i vogël piktoresk në jug të Shqipërisë, rriti ndikimin dhe potencialet për rritje të të ardhurave nëpërmjet ofrimit të programeve të reja dhe të freskëta. Kështu, si pjesë e Projektit “Media për të gjithë”, RTSH Gjirokastra prodhon dokumentarë për zhvillimin social-ekonomik dhe kulturor të qarkut të Gjirokastrës. Deri tani janë prodhuar 4 nga 10 dokumentarët e planifikuar. Ndër temat e trajtuara janë rinia, çështjet e minoritetit, gratë sipërmarrëse, mjedisi, sfidat e agro-turizmit dhe zhvillimi i rajonit.
Nga RTSH Gjirokastra theksojnë se reagimi i publikut është pozitiv. Por ajo që është edhe më e rëndësishme është “rritja e të ardhurave nga reklamat për këtë media”. Një efekt tjetër anësor është kërkesa në rritje për agrobiznesin lokal të promovuar përmes dokumentarëve.
“Dy nga dokumentarët u kërkuan nga zyra qendrore në Tiranë për t’u transmetuar në Transmetuesin Publik Kombëtar,” na thanë nga RTSH Gjirokastra.
Ideja e tyre për biznes është të zgjerohet numri i reklamuesve duke diversifikuar dhe përmirësuar cilësinë e përmbajtjes mediatike dhe të programit televiziv. Një tjetër qëllim i rëndësishëm është përmirësimi i pranisë së këtij televizioni në mediat sociale.
Projekti “Media për të gjithë” po mbështet RTSH Gjirokastra për sigurimin e pajisjeve cilësore, të cilat më parë i mungonin kësaj medie, për prodhimin dhe editimin e videove, si dhe po ofron mbështetje për ngritjen e kapaciteteve/mentorim në lidhje me prodhimin dhe transmetimin e dokumentarëve.
Arjan Xhani, Drejtor i RTSH Gjirokastra, theksoi se “kjo është hera e parë që marrin financim nga një donator,” duke shtuar se “cilësia e dokumentarëve është mjaft e mirë falë pajisjeve të reja dhe mbështetjes që na kanë dhënë ekspertët e Projektit ‘Media për të gjithë’.”
Deri në fund të projektit në mes të vitit 2022, RTSH Gjirokastra do të prodhojë 6 dokumentarë të tjerë, duke mbuluar çështje të tjera social-ekonomike ndërkohë që promovon karakteristikat e një turizmi të pasur të të gjithë rajonit.